چنئی سے ابوظبی جانے والی پرواز میں ٹیک آف سے قبل آگ لگ گئی

بھارتی شہر چنئی سے ابوظبی جانے والی ایک پرواز ٹیک آف سے قبل بڑے حادثے سے بال بال بچ گئی جب طیارے کے پر میں آگ لگ گئی۔

بھارتی میڈیا رپورٹس کے مطابق طیارہ رن وے پر ٹیک آف کی تیاری کر رہا تھا کہ اس دوران آگ بھڑک اٹھی، جس پر پرواز فوراً روک دی گئی۔

طیارے میں تقریباً 280 مسافر سوار تھے جنہیں فوری طور پر بحفاظت اتار لیا گیا اور کسی جانی نقصان کی اطلاع نہیں ملی۔

پائلٹس نے آخری لمحات میں آگ کو نوٹ کیا اور فوری طور پر کنٹرول ٹاور کو اطلاع دی، جس سے بڑا حادثہ ٹل گیا۔

فائر بریگیڈ نے موقع پر پہنچ کر آگ پر قابو پالیا اور اسے مزید پھیلنے سے روک دیا۔

حکام نے طیارے کو گراؤنڈ کر دیا ہے جبکہ واقعے کی تحقیقات شروع کر دی گئی ہیں تاکہ آگ لگنے کی اصل وجہ معلوم کی جا سکے۔